Friday, January 1, 2016

लिहिता लिहिता ...

आज प्याला रिता आहे
कागदही पालथा आहे
गजबज होती काल जेथे
आज बस शांतता आहे


होते सारे जे विचारी
लिहून थकली गात्रे सारी
क्लान्त या शरीरात माझ्या
अजब अशी शून्यता आहे


नववर्षाची नवी पहाट
नको उगा ते जुने चऱ्हाट
नव्या क्षितीजाच्या दिसण्याची
खरेच का सुरूवात आहे ?


असते नव्या सर्जना आधी
म्हणे एक रिकामी साधी
कोरी करकरी नवीन पाटी
तीच माझ्या आत आहे ?


अक्षरांचा खेळ बांधला
शब्दांचाही मांडी भोंडला
खरेच सांगू पुन्हा लिहीता
वाटे मज मी सुखात आहे….

3 comments: